مرقص إقلاديوس _ يكتب....
#======================#
تعالوا نتعلم ألف ..باء
قصة رجوع..
.........
الالف. ابتدينا الحياة بالبكا زاعقين.
الباء . بقالنا من يوم ما اتولدنا
على الحال ده سنين.
التاء .توك عرفت إن احنا
.زى ما جينا فى يوم
.فى يوم برضو مروحين.
الثاء .ثلاثة ستبقى ...
عملك لنفسك،
ذكراك للاصحاب،
و لحظات قصيرة عشناها فرحانين.
جيم.جينا الدنيا من غير ما ياخدوا رأينا.
حاء. حنمشى منها برضو غصبن عننا.
خاء .خايف أوى من لحظة المرواح
و واثق أوى فى رحمة ربنا.
الدال.دأ انا كنت فاكر العمر طويل.
الذال. ذاك يعتبر حلم جميل.
الراء. رميت السنين ورايا
و حانت ساعة الرحيل.
الزين. زينتلى نفسى أخطاء كتيرة
أخطاء ما لهاش مثيل.
السين. سايب ورايا ذنوب ياما.
الشين.شايل شيلة تقيلة
معاصايا و عمايا.
الصاد. صاحبت من البشر جن و شياطين
. و ياما زودت على اللى باحبهم قسايا.
الضاد. ضليع فى كل المعاصى،
. خبير فى كل الآثام،
مدمن لكل الخطايا.
طاء . طلبت من ربنا كتير أتوب و أرجع.
ظاء.ظنيت إنى تبت بعد صراخى،
و القلب لم يخضع.
عين .عينيا تعبت من كتر البكا
و بكا المعاصى بيوجع.
غين. غريب عشت عن نفسى و عن الناس
و فى الآخر نويت اركع.
الفاء. فقت بعد طول الغيبة
و قسوة الترحال.
القاف .قلت يا رب
انت عمرك ما رديت لسائل سؤال.
الكاف .كنت تايه و ادينى رجعت
اقبلنى يا كلى الجلال و الجمال.
اللام لقيت ربنا فرح برجوعى
مع إن ذنوبى تتعمل موال.
الميم مديت ايديا لفوق
حسيت إنى اتخلصت من الأحمال.
نون. ناوى و النية لله افضل عل طول وياه.
هاء . هأحاول ما ارجعش اغلط
لغاية ما ارجعله سماه.
واو . و هاعيش أسبح بحمده
و بكل ما صنعت يداه.
لا..لا لكل ما و من يبعدنى
عن الحياة معاه و وياه.
ي ..ياه ياه ياه ياه
سكة طويلة
سكة عمر .... سكة حياة
ملاح بحور الحكمة
مرقص اقلاديوس
ليست هناك تعليقات:
إرسال تعليق