أحمد الساعي _ يكتب....
$===================$
إللى بِنِصْبَحْ فيه نِبَات
***************
***************
سَعَات أَحِسْ إن البلد ملهاش كبير
و سعات أحس إنَِى أنا عبد و أجير
و سعات أحس إن القمر أصبح أسير
و سعات أحس إن الفضا سجن و كبير
و سعات أحس إن الأمان ملهوش ضمير
و سعات أحس إن الحمام رافض يطر
سعات أحس الكل تاه ف الكل
ليه ؟؟
الصدق كدب
والكُره حُب
و الطِيبِه غِلّ
و سعات أحس إن العسل ف الحلق خَل
و الشمس ضل
و الشوك على غصن الزتون
وُرُود وفل
و العقده بعد العقده حَل
و سعات أحس إنى هطير من فرحتى
و ف نفس ذات اللحظه تنزل دمعتى
تجرح جفونى ليه و تطفى شمعتى؟؟
و أنا بين ولادى ف حضن أهلى و حِتِّتِى
أنا ليه أحس بغربتى ؟؟
و النا س تقابل بالقساوه محبتى
و سعات بَعَانِد دنيتى
و النار بتاكل جِتِّتِى
أضحك و أَعَلِّى ضحكتى
ساعت ما أَرَوَّح ف المِسَا
يُحضن أسايا مخدتى
تروى عطشها بدمعتى
و سعات بشوف الكون براح
و لا فيش جراح
مِسَا و صباح
سَدَاح مَدَاح
أفرد دراعى كَمَا الجناح
و أحضن أمل
و أودَّع اليأس اللى راح
وسعات أحس إن النجوم ف الليل بتطلع مَنظَرَه
مِتْحَيَّرَه
مِتْغَيَّرَه
مِتْكَدِّرَه
و سعات أشوف الكون
بلون الورد نَادِى ع الغصون
و سعات بشوف الليل بيكره نجمته
فرحان و عاشق ضلمته
و كمان بتكمل فرحته
لمَّا بِيِحْرِم القمر من طلعته
يطلق خفافيش تعشقه من قسوته
ع الناس يمارس لعبته
دى حجته
الناس تخاف من بطشته
و سعات سعات
الفجر يطلع من سكات
من غير أوان و لا شقشقه
و لا صوت أدان و لا زقزقه
و الشمس طالعه محندقه
و مروَّقه
و بأحلى توب متزوَّقه
تفرد شراعها ع الغيطان
فرح و أمان
و الزرع الأخضر بالندى كاسى المكان
و المناجل ف الادين
تحضن سنابل بالحنين
خير السنين
و سعات بشوف الطير حزين
و غناه أنين
و الدمع هادر م العنين
و الفرع مايل
و الإدين مليانه طين
أشكى لمين وجع السنين ؟؟
و سعات مَحِسِّش بالسعات
واللى بِنِصبِح فيه نِبَات
ما هُو اللى جاى زَىّ اللى فات
لزمتها إيه سعات سعات ؟؟
*******************
أحمد السباعى( أبو سميره )
***********
ليست هناك تعليقات:
إرسال تعليق