مرقص أقلاديوس _ يكتب....
$======================$
وجهة نظر غريبة شويتين
.........
رحت للورد أحاكيه.
سألته عن أحوال العالم،
و إللى جرا فيه.
قلتله
بيقولوا عليك فى الأغنية.
إنك ياما جرحت أيادى.
ده حتى جرحت أيادى الجناينية.
قالتلى وردة...
و يا ترى سألت.
كانت عاوزة إيه الأيادى.
كانت عاوزة تنزعنى
و بيا تهادى.
و أدبل بعد يومين.
و أنداس تحت الرجلين.
و إللى يعمل كدة فى وردة،
و يدعى إنه بيقدمها
لشخص غالى عليه .
هييجى يوم يعمل كدة
فى حبيبه
و يقسى عليه.
قالتلى وردة تانية.
الناس فاكرة.
إن أنا بأكره شوكى النامى.
مع إن شوكى أغلى حبايبى.
لأنه عنى بيحامى.
و يا ويل إللى يقرب منى..منه.
يرجع و دراعه دامى .
قالتلى وردة تالتة.
لو عندك صبية..
علمها...
إن الدنيا مليانة أسية.
و إن لازم تختار حبيب
قلبه طيب
يصونها صدره من غدر الدنيا.
يبقالها حبيب
لما قلبها عليه ينادى.
و يبقالها سور من شوك
ضد الأعادى.
و لو عاوز يهاديها،
بدل ما يهاديها بوردة تدبل.
قلبه و عمره
اللى يقدمهم ليها هدية
و بيهم يراعيها.
ملاح بحور الحكمة
مرقص اقلاديوس
ليست هناك تعليقات:
إرسال تعليق